...............
وحيد محروس خليل
.................
(( بين الضحكة والضحكة ))
وما بين الضحكة والضحكة
حلم كبير وملهوش حد
وبين الدمعة والدمعة
آلام وآهات بنعيشها بجد
%%%%%%%
أيام عايشين نحايلها
وهي كل ساعة بحال
دايماً تايهين في تفاصيلها
وحاجات ماخطرت يوم على بال
%%%%%%%
ساعات تفرح وساعات تجرح
ودموعنا تعزف ع الموال
وساعات قريبة وساعات غريبة
وساعات نعيش فيها الأهوال
%%%%%%%
طيب ليه يادنيا وخدانا
بتبيعي يادنيا وتشتري فينا
وعمرك مامشيتي على هوانا
و أحنا إللي فينا مكفينا
%%%%%%%
دا الحزن عشش جوانا
والفرح مابتشوفه عنينا
إرحمي عذابنا وآسانا
وحني علينا وضمينا
%%%%%%%
صابرين بنمشيكي جمايل
وإن قولنا آه يقولوا ممنوع
والحمل يادنيا صبح مايل
وياما ناس بتموت م الجوع
%%%%%%%
زمان كانت فيكي الطيبة
وقلوب مليانة بخير وحنان
دلوقتي الطيبة بقت عيبة
وفي الأساطير وكان ياما كان
%%%%%%%
على إيديكي ياما شوفنا عمايل
والقلب منك بقى موجوع
عايزين نشوف فيكي بشاير
وصوتنا فيكي يكون مسموع
%%%%%%%
بين الضحكة والضحكة
بقلمي الشاعر/ وحيد محروس خليل
ليست هناك تعليقات:
إرسال تعليق