..................
وحيد محروس خليل
...............
(( دنيا غريبة ))
فيها ناس بتتحايل ع القدر
وناس بترضى بالمكتوب
وناس تلعب بالبيضة والحجر
وناس عيشاها بالمقلوب
**********
فيها ناس بتغزل م الفرح جدايل
وناس دموعها دايماً سبقاها
وناس على العيشة بتتحايل
وبتخفي جواها قساها
*********
فيها ناس الخير مغطيها
وناس من البخل عريانة
بالشكر ربنا يديها
وناس في الهم غرقانة
**********
فيها ناس حياتها عال العال
وناس أهي ماشية بالتيلة
وناس جمالها يزين المال
وناس بالشح عليلة
**********
فيها ناس الكبر ملاها
لا بتعمل خير ولا معروف
وناس الخوف عشش جواها
ومستسلمة لقهر الظروف
**********
فيها ناس كلمتها زي السيف
وناس مبادئها سداح مداح
وناس كتيرة إيمانها ضعيف
ومفيش حد عايش مرتاح
**********
فيها ناس بتاجر بقوت الناس
وناس بتلعب ع الونجين
وناس في قلوبها مات الإحساس
وناس مش عارفة إزاي ولفين
**********
فيها ناس كمان عايشة بوشين
وناس بتمشي على الحبال
وناس كتير خاينة وغدارين
من غدرهم تزول الجبال
**********
فيها ناس ظريفة كدا وكيوت
وناس رخمة الغل ماليها
وناس بتتمنى العمر يفوت
وترجع قوام لعفو باريها
**********
دنيا غريبة
بقلمي الشاعر/ وحيد محروس خليل
ليست هناك تعليقات:
إرسال تعليق