ديوان أكاليل الإلكتروني لسفراء القلم

..........

مع ارق تحيات فاروق الباشا

............

يوم من عمرى. فاروق الباشا

الورد تمر حنة
والريحة جاية من الجنة
والمية عصير ورد
متحلية بعسل شهد
والغوايش جوز وفرد
والمشاءالله هدية ماتترد
والقمر بدر فى تمامه
والكل عندنا خدامه
قلت ياسعدى ياهنايا
جانى نصيبى ومنايا
قلت له خد ايدى
دا انت فى الدنيا سيدى
وسيدى يعنى وديدى
قال لى بلله نتهنى
بايدى اسكنك الجنة
مشانى على بساط احمر
منقرش الله اكبر
بالراحة قلت اتمخطر
دا انا فرحتى ماتتقدر
قلت والله فيك ماافرط
ولا يوم عليك اتشرط
جابى ورد الوان
بأيده قطفه من البستان
وجابلى عقد لولى
بأيده لبسهولى
وجابلى بلح زغلولى
واقف بيه الخولى
اشاور يناولهولى
وجاب لى كمان فستان
مزهزه وكل ستان
وجابلى كمان رمان
يزعق يقول انا رمان
دا كله رهن بنان
وجابلى سلسلة فضة
لاجل تحفظنى من الخضة
وجابلى مصحف قرإنى
لاجل يزود ايمانى
ومعاه جابلى مصلية
اقف عليها متوضية
اصلى وادعيله
يارب يخليه لية