ديوان أكاليل الإلكتروني لسفراء القلم

...........

بقلمى..الشاعر ناصر عطامحمد

بقلمى... Nasser Atta

............

...*** مسحراتي *** ...

مسحراتي .. داير ليلاتي ..

أسحر الصايمين

الدق طبلي .. والكلمة أهلي ..

تنده على الملايين

أقول ياهادي .. كيد للاعادي ..

أسترنا دنيا ودينا

أصحى ياحامد .. ياقلب جامد 

حارس بلدنا أمين

وأنت ياماجد .. بلاش تعاند 

نايم مع السلاطين

أصحى ياصبحي .. وانده لجارحي

وسحر الباقيين

النوم خسارة .. إحنا فى حارة 

تجمع شمال ويمين

هاتوا السحور .. الفجر نور ..

والوقت راح يا حسين

بقول كلامي على كد حالي ..

والعبرة للسامعين

جارك حبيبك .. مالك فى جيبك 

أعطف على المسكين

إدفع زكاتك .. تلقى نجاتك ..

والجنة للصابرين

ومد إيدك .. صدقة تفيدك ..

تنقذ بها ملايين

تعالوا نجري .. نصلي فجري

وندعوا للتايهين

يارب تهدي .....أحمد ومهدي

يبقوا من التايبين

خلاص ياحارة .. النور أمارة ..

فجرك اشارة ..

صوموا .. وقولوا .. أمين

بقلمى..الشاعر ناصر عطامحمد

بقلمى... Nasser Atta