.............
قصيدة/احضنوها
للشاعر مصطفى فريد
..........
من كتاب مؤتمر كتاب ضد الأرهاب
احضنوها وكونوا ليها
من قلوبكم مخلصين
احضنوا الطيبه اللى فيها
حضنها هو اليقين
واللى براه النهارده
مش هيلقى له معين
سنين وساكنين قلب جوفها
رغم فينا كدابين
عايشين على دم الغلابه
قلوب ديابه ومفسدين
حلمهم تدمير حياتها
بإيد شوية مأجورين
يلعنوها كل لحظه
وهما بيها مستورين
ياكلوا فيها ويشربوها
ويبيعوها المجرمين
اللى مايستهلوا خيرها
خونه رسمى وسفاحين
الكنائس فجروها
بدم بارد من يومين
والدموع الغاليه سالت
نار على الخد الحزين
قطفوا عمر الورد ضاعت
كل تحويش السنين
راح اخويا وابنى بدرى
شهدا بإيدين ملعونين
مجردين م الإنسانية
عطاشا دم ومسعورين
انتوا ليه عايزين خرابها
إنتوا اصلا تبقوا مين
الإيمان عاشق ترابها
والملايكة مؤيدين
والكنايس والجوامع
انتوا منها مرفوضين
والتوراة ماقلتش تقتل
يبقى دينكم أى دين
توصفوا العايز يصونها
بأنهم متخلفين
واما ايد تتمد تبنى
يحبطوها المحبطين
واما تتسرسب دموعها
تكونوا اول شمتانين
فى عرف مين طبع الشماته
انكتب وفى أى دين
اللى مش عاجبه عيشتها
يسيبها احناالكسبانين
احنا شارينها بحياتنا
بغيرها نبقى عريانين
الوطن مش لقمة تيجى
بالشحاتة او بدين.
الوطن يبنوه شبابه
ايدين ولاده المخلصين
مش شوية ارزقيه
مرضى شهرة وأفاقين
شوه الإعلام بتاعهم
النفوس الطيبين
اللى واصف اهل بلده
بالجهالة وشحاتين
واللى صورها بكامرته
ناس كسالى ونصابين
مبدورين فوق القهاوى
ليل نهار متلطعين
غرقانين ضمنه وشيشه
م الحشيشه مسطولين
واللى هان اسم انكتب
عاش وطن للآمنين
اسم له معنى ودلاله
وصى عليه طه الأمين
له حضارة وله مكانه
فى قلوب الصالحين
إرحموها وحسوا بيها
كونوا ليها منصفين
جوه منكم احفظوها
زى قرآنا المبين
تلات حروف علمها بيهم
فوق سطورة منورين
خير اجناد البريه
والرباط جامد متين
يا للى فاكرين العبادة
هى قتل المسلمين
والطمع طافح زيادة
لجل فكر خسيس لعين
شغلوا عقولكم معايا
الأيمان مش شعرتين
بيض على راسك ولحيه
وانت ألعن من كوهين
الإيمان افعال وقدوة
تهدى بيها الحيرانين
واللى عنده لبكرة فكره
يرمى بذرتها فى طين
لاجل ماتطرح أمانى
يضم كل المحتاجين
الإيدين تزرع وتحصد
خير لكل الشقيانين
هى دى اصل الحكايه
والروايه فى كلمتين
إنتمى للأرض تكبر
صلى فيها وقول آمين
ربنا يبارك صلاتك
يجمعك بالمهتدين
بيك بغيرك هى باقيه
واحنا ليها مودعين
اصلها الجنه اللى جايه
بإذن رب العالمين
إحضنوها وكونوا ليها
من قلوبكم مخلصين
احضنوا الطيبه اللى فيها
حضنها هو اليقين
ليست هناك تعليقات:
إرسال تعليق