................
وحيد محروس
..............
(( أشكي لمين حالي ))
أشكي لمين حالي
وإنت العالم بيا
وأحكي إللي بيجرالي
وأنت الأحن عليا
أمري مابين أياديك
وتوكالي كله عليك
في سري وعلني بناديك
وأرفع للسما إيديا ###
$$$$$$$
كرمك علينا ملهوش حد
بتقابل الإساءة بالإحسان
وباب رحمتك مفتوح ما تسد
سبحانك ياربي رحيم رحمان
سامع ياربي دعا المظلوم
في أي وقت وكل مكان
وعالم ياربي بكل علوم
بناديك بقلبي أنا وعينيا ###
$$$$$$$
عدلك وكرمك مالي الكون
والعاصي يرجع ليك ويتوب
أمرك مابين الكاف والنون
ياساتر بسترك كل عيوب
وأنا بين إيديك كله بيهون
سبحانك ياربي رب قلوب
وإنت حبيبي وضي عينيا ###
$$$$$$$
في عز كربي بلجأ إليك
وفي اي وقت دا شيء مسموح
وبرمي ياربي حمولي عليك
ياطبيب وشافي لكل جروح
وأسجد بجوارحي مابين أياديك
أدعي وأبكي بقلبي وأنوح
ولا مهرب ليا إلا إليك
ورضاك عليا أغلى هدية ###
$$$$$$$
أشكي لمين حالي
بقلمي/ الشاعر وحيد محروس
ليست هناك تعليقات:
إرسال تعليق