.............
د/محمود قطب زايد
...............
واكتملت القصيدة
...............................
وماعدشى شىء
باقى معايا
من الذكريات
غير كام قصيدة
وبيت قديم
وحبة حاجات
تقلش ضلة
فى ساعة طفولة
كنا نجرى تحتها نستخبى
ونترمى من غير دموع
اوبكا أو حتى الآهات
أو مشية حلوة
بعد العصارى
على شط ترعة
تحت جميزة
معرشة فوق السطوح
وبترمى ثمرة موهوجة
يشبه جمالها
زى خد البنات
والتوتة تفرش فرعها
فوق السواقى
وبنغمة حلوة وتنهيدة
تنادى على النسمة
تعالى ده العصر فات
قومى يلا ولملمى
ضى الشموس وزغردى
والليل بيزحف خطوته
مليان سكات
يانسمة قومى ادلعى
فوق الزهور وهفهفى
ورشى عبيرك وافرشى
دربك الصافى بالزهور
ويا العبير والذكريات
وتعالى نملأ دربنا
بالفرح وبالأغاني
ونرقص ذى الورود
لما النسيم يعاكسها
وتميل بتضحك
وتنشر العطر
المقطر فى كاسات
وذكرى حلوة من الطفولة
لما كنا نعبى
شعاع الشمس
فى ملابسنا ونجرى نغنى
الثعلب فات فات
أو نجرى ونلعب
فى الحقول
ونجمع التمر المشرد
فى ظلال النخل
بعد الريح ماهزت عراجينه
ترك السباطة من سكات
.....................................
د/محمود قطب زايد
ليست هناك تعليقات:
إرسال تعليق