.............
عاطف عبد الحميد
..........
اعتذار
........
الصوره فيا مشوشه
و الحلم من خوفه اختشى
و انا غصب عنى مصدقه
رغم الملل و الدروشه
يا كل احلامى ف بدن
العمر ف عينيكى إتركن
و انا بين كراكيب الزمن
أيامى شبعت كرمشه
........
مستعجله ليه ع السكوت
و الهجره فى بحر الخرس؟
ياللى انتى عاشقك قلبى موت
من غير دليل و لا حرس
يا آخر السطر العبيط
ملضومه ايامك ف خيط
بتلملمى الحلم البسيط
ما بين تراتيل الجرس
......
طب لسه ليه متردده
تمشى الطريق اللى ابتدا؟
من غيرك انتى ماليش مكان
و انا حرف تايه ف المدى
مجروحه ليه فيكى الصور؟
يا بسمه ف جبين القمر
على كل حال قلبى اعتذر
بس الدموع من غير صدا
......
طب بصى حتى ف كل عين
رح تلمحى جوايا مين؟
يا آخر الحلم الجميل
ياللى عيونك زعلانين
آسف على خدود القمر
دبلانه من طول السهر
يا احلى من كل الصور
قلبى مخاصمنى من يومين
........
عاطف عبد الحميد
ليست هناك تعليقات:
إرسال تعليق