ديوان أكاليل الإلكتروني لسفراء القلم

.........

بقلمى سامح توكل أبوالسبح

...........

أنين
=====
أنا والدمع متصاحبين
وتوب الفرح ناسينا

نفصل من الليالى أنين
يلملم جرح ماضينا

آهات مزروعه على الشطين
ومين يسمع شكاوينا

كاسات المر سارقه سنين
ومن قسوتها تسقينا

كفوف الظلم ليه قاسيين
بتعصر فى أمانينا

وليه على الفرقه متعاهدين
تزيد الحرقه فى عنينا

وينزف جرح على الخدين
بحور الدمع تروينا

ونعتب ليه على الظالمين
مدام روحهم تعادينا

يادنيا قلبنا مسكين
بلاش والله تعاندينا

قطفنا الزهر من البساتين
بنهديه للى ناسينا

لقينا الدم على السكين
بحور غارقه فى وادينا

أنا مركب غرام وحنين
ناسيها الشط والمينا

أنا ناى الألم ورنين
شجن طفى غناوينا
=====
بقلمى سامح توكل أبوالسبح