.............
وحيد محروس خليل
..............
(( ماشية بالمقلوب ))
ماهي دنيا وماشية بالمقلوب
وأيام عايشنها سداح في مداح
والطيب فيها صبح معيوب
والغني فيها عايش مرتاح
دا الفقر صحى جوانا ذنوب
وعلى قوت الفقرا قاموا الأفراح ......
&&&&&&&
أصل الفلوس بتسوي الهوايل
معاك المال هتعيش مبسوط
وغيرك للأحمال عايش شايل
وكاره حياته بيتمنى الموت
حتى العيش الحاف مش طايل
وم الكل بياخد بالشلوت .......
&&&&&&&
بقى الكل بيحكي بلغة الكام
وقيمتك على أد إللي معاك
لو معاك أوكيه وكله تمام
ولو فقير يلعنوا من رباك
والكل يشوفك زيي زكام
ربك يسترك وخسيس عراك .......
&&&&&&&
دنيا غريبة مليانة وحوش
ولا فيها مكان للطيبين
أسترها علينا يارب وحوش
صابرين ع الفقر وأدينا تايهين
زي السمك بتبلغه القروش
أموات والإسم إننا عايشين ......
&&&&&&&
فيه ناس مش لاقية العيش الحاف
وناس بتاكل مارونج لاسيه
وناس بتعاني وسنينها عجاف
وعاش الملك ربنا يخليه
الله يرحم زمن الأسلاف
والعدل راحت فين أراضيه .......
&&&&&&&
بسي دا كله أكيد مكتوب
آكل الحرام يعيش مرتاح
وطالب الحلال ياكل طوب
عفوك ياإلهي طالب السماح
ماهي دنيا وماشية بالمقلوب
وجاية علينا بكل نجاح ......
&&&&&&&
ماشية بالمقلوب
بقلمي/ الشاعر وحيد محروس خليل
ليست هناك تعليقات:
إرسال تعليق