ديوان أكاليل الإلكتروني لسفراء القلم

..... أمل الشابي....

انا الحرة التونسية ❤.. انا علجية و ساسية.. انا المرا المقدية...انا السّفساري و الخلخال و أنا مولاة البوسة خال...أنا الملية و الخلال..أنا الشّامخة البية لا نتمثل لا بالشّمس و لا بالقمرة...أنا الّي نصون العرض و بذراعي نخدم الأرض...أنا سر الحياة ... أنا في الغريق حبل النجاة...أنا نجمة تضوي في سماك ... أنا في محبتك و ودك ملاك...أنا البحر و سفينتو ... أنا العاشق و خليلتو ... أنا الحب و سيرتو
أنا اللي تشيد بآسمي الألحان🎼🎵، تغنت بيا الأشعار و غنى هاك الفنان أنا زينة بنت الهنشير بنت القمح و الشعير...أنا البيضاء و أنا السمراء...أنا الغنية و الزواليّة و أنا المرا الحاذقه و المقديّة...أنا بنت الرجال و في وقت الشده نهد الأجبال...لا يغرني جاه و لا مال نمشي بفخرة و دلال...أنا العبير 😍الفوّاح و نور الصّباح ،
أنا الباهية و ماني دونيّة و يدّي في يدّك تتحل كل ثنية...أنا زينة البلاد و أمّ الأولاد و جدّة الأحفاد...أنا اللّي نحمل الهم و بلادي نفديها بالدم انا الّي نداوي و نبرّد الجروح............امل الشابي