.................
نذير دهان
..................
الاسبوع الماضي قرب جزيرة أرواد غرق مركب سوري لمهاجرين إلى أوروبا
هربا من الجوع والهم وبعرض البحر غرق المركب بسبب حمولته الزائده
وجشع المهربين الذين كل همهم جمع المال ولو على حساب أرواح الناس
وقد هب ابطال أرواد الاشاوس وبذلوا
كل جهد لإنقاذ اخوانهم ،،،لهم منا كل شكر وتقدير
(((مأساة حقيقيه)))
الطمي ع خدودك ندابه
وشقي التياب
وصيحي بالصوت العالي
غرقوا الاحباب
تركوا بلادن وهربوا
م الخوف والجوع
وحلفوا بالله ماعادلن
إلها ارجوع
بعرض البحر ياويلي
هاجوا الجموع
انقلب المركب ويل ويلي
الموج غلاب
*******************
مين المسؤول يا عالم
عن هللي صار
ماحسبوا حساب بإنو
الموج غدار
غرقوا نسوان وشبان
وصغار وكبار
كل الحسبوه رح يصلوا
كان الحساب
******************
المجرم يللي سفرهم
كل همو المال
قالولو عددنا ع المركب
خطر لو ينشال
هدد اللي يعارض
بقتلو بالحال
خافوا وركبواياعالم
الموت مهاب
*******************
وقلب المركب وهاجوا
اشتغل الصراخ.
حرمه تصيح فين ولدي
يا ولدي آخ
وختيار يقول عم نغرق
يا عالم واخ
بدها همه ومن أرواد
هبوا الشباب
*******************
الله يبارك همتهم
عملوا مجهود
صارعوا الموج ماشالله
يبارك الزنود
اللي تساعد وتساند
من غير حدود
الف اسم الله ماشالله
ع اسباع الغاب
********************
شعر ؛ نذير دهان
ليست هناك تعليقات:
إرسال تعليق