................
عبد الرسول كريم
............
(حتي الشيخ طلع م الجان)
....................................
بالراحه وخف عليا يا جان
انا مش كدك د انا غلبان
قانوني غير حتي قانونك
عمري ما خونك أنا إنسان
إنت خيال ف الضلمه تضر
بتيجي تمر ولا السلطان
ف بيتي تِكِن وتكشف سر
ف لحظه تفر كانو شيطان
لو حتي بكون قافل الدار
بتولع نار وتهد حيطان
وتروح لحريمنا عليها تلوف
ومش مكسوف ولا غلطان
وطبعا صيدهم سهل سمين
تسيب يسمين تمسك أشجان
طب ايه الحل لوقف أذاك
روحت آنذاك للشيخ مرجان
بص وقالي اهلا يا افندي
كشفك عندي د بالمجان
باوصفلو الحال دار وإتلف
وهفّني كف وقرا الفنجان
وطلب قرش يكون مخروم
من جيب محروم أيان كان
ومعاه ضفر لدكر النمل
وكبد القمل و ست حيتان
وديوك وبشرط الريش فيهم
تتبخر بيهم وقت آذان
عملت الوصفه لقيت جِنّيه
مسكت فيّا مع الدخان
نطيت مخلوع وسألتها مين
قالتلي حنين ومرات مرجان
شعر المستشار / عبد الرسول كريم ٢٠٢١/١١/١
ليست هناك تعليقات:
إرسال تعليق