...................
إسماعيل البلبوشى
.............
رسالة من القبور
فتوني ف شنهور تحت التراب
أنا ليا شهور متنعمة وربك وهاب
وحشتوني يا واد وطال الغياب
وحشتني اللمة ودوشة العيال
وقعدة العصاري على العتاب
وأنتى كمان يا غالية وحشتينا
وعاملة أيه الجدة غالية طمنينا
أنتوا ناس أعمالها حلوة وزينة
وغيبكم صعب علينا وعذاب
كنتي ف العيد يا حاجة بتلمينا
وتفرحى القلب اللي شاب
أخباركم أيه ما تقولى يا واد ؟
وعاملة أيه البت نجوى
قولها تقوى أنا من بكاها كل ليلة بتوجع
يعني كتير بكاها هيخلينى يا واد أرجع
قولها اللي خلف ما ماتش. ده ساب
رجالة كبار. وخليها تعملى صدقة شراب
ميه تروى العطشان ويا محله ثواب
أنا حيه لسه فقلوب كل الأحباب
وقل أحمد ما يسبش أخوه
يحط يده في يد أخوه
وما يبعدش زي أبوه
وربنا يهدي اللي تاب
وخدوا بالكم من خيتكم
وفهد ده وصية عمتكم
أنا عارفة جلعوه ماسخ ويتعب الأعصاب
عقلوه وعرفوه وبالهدوة فهموه
عصبي وفقرى. ودمه حامى زى أبوه
بكره يعقل وده حال كل الشباب
وأخباركم إيه كليتكم
كويسين مع بعض زي ما ربيتكم
والله صعب..
يعني دقيقكم فارق زيتكم
وبعد موتي الفتنة دخلت بينكم
وكل واحد رادد عليه باب
ساكت ليه يا قارش أمك ما تقولي
و يعني كلامي هيفرق أيه
وهيغير أيه وأحنا تملى
بناكل ف بعض زي الدياب
يا ولاد الكلاب ضيعتوا محبتكم
ودخل بينكم شيطان بخراب
خرب بينكم وفرقكم وغاب
راحت فين بقى عقولكم
دا أنا عشت سنين بعقلكم
وأحادى وأصلح المكسور
وأدادي وأرجع اللي يغور
ولما كنت أحس بنفور
أو حد فيكم زعل أخوه
وساب خاطره مش مجبور
أولع نور وأبعت له حضور
مالك أنت وأخواتك مفتون
أياك يا واد تكون مجنون
وعايز تبني بينك وبين أخواتك سور
وفين كبايركم وكبيركم
ولا بعد موتي الشيطان ركبكم
وكليتكم كبرتوا وبقيتوا كليتكم نسور
طب فز غور الأخوة أخوت الدنيا
أدينا سبنها فى ثانية
وسكنا بعد الموت القبور
أزرعوا قلوبكم بالمحبة
وبلاش تخلوا أرضكم بور
وتخدكم العنطزة والغرور
الدنيا لها ألف حسبة
والكفن مالهوش جيوب
مين هيأخد معاه عزبة
ومين كان خالى العيوب
مالك يا واد ساكت مغلوب
مغصوب على أمرى يا عمة
ربنا يزحها دى غمة
دا شايل على قلبي طوب
مالقيتش حد يقف فضهرى ويسندنى
أقرب ماليا رفع يده والكل سابني وكدبنى
وشوفت الويل وطفح الكيل عن المنسوب
سبها للخلقك مش هينساك وخلى عنك يابنى
وما تزعلش نفسك يا واد أخويا كل شئ مكتوب
وبكره تروق وربنا ينصرك وأستغفر َ ربك وتوب
والشمس مهما طالت لابد لها غروب
وبن المركوب اللي فتنكم عليه مغضوب
وله يوم موعود تشوفوا حاله مقلوب
وبكره الحق لأصحابه يعود وربك رب قلوب
قادر يعوضك وتعود واقف ساند نفسك منصوب
كلمات وأشعار إسماعيل البلبوشى
ليست هناك تعليقات:
إرسال تعليق