......................
إسماعيل إبراهيمي
..................
عشق الصح
عمره لا يفنى ولا يزول
و عشق الخدع يدبل
كي عليه المد يطول
وياويل لي باسم الحب لعب
و خان العشرة و الوعود
وياويل لي بدموع العيون تسبب
و خدع لي كان ليه محبوب
بدمع العيون
راني نكتب و بصوتي نعبر
بعقل مجنون
راني ليلة يا ناس معاكم ساهر
مجروح مغبون
مدمر وخاطري خاسر
عشقت محنة و اصبحت مهزوم
وفي سجن العذاب حاصل
ضنيت روحي نسعد
وبالحب حبيت نزين ايامي
جبت راسي ضر
و من جديد رجعت تاني نعاني
وحيد حزين نتعدب
وعايش كاره ايامي
قصتي قصة حب
ما لقيت ليها عنوان
حكايتي حكاية قلب
عاش في كدبة و اوهام
بي نضرة الاولى بدأ
جى الولف و تبعو الغرام
حتى اصبحت لقلوب متحابة
ومتعاهدة على الصدق و لمان
خانتني و ما كانت لي صادقة
بي كدوبها رمات قلبي في المحان
جرحاتو وكوات جمرة
القلب لي حبها من دون نسوان
وحسب في حبها ليه صادقة
انسانة واعية او على بال
امنها كي قالت هجالة و مطلقة
حتى خرجت خرجة ما كانت في الحسبان
و صدمتني ياناس اكبر صدمة
ما خافت رب ولا نعلت الشيطان
مرات راجل وام بنات يا حسرا
كي نجي ننطقها يتقال لسان
و في داتي نتقرح قرحة
لي دارتو هي حرام
ما خافت ربي ما في قلبها رحمة
ما قالت عيب ولا عار
و قدماتني معاها لكافرة
مانسمح ليها مهما كان
سوى في الدنيا ولا في الاخرة
هدا اخر لكلام
و بيناتنا الرب يا مرا
بقلمي إسماعيل إبراهيمي
شعر ملحون
ليست هناك تعليقات:
إرسال تعليق