................
بسام أبو مصطفي
..............
طريق عكسي
*******************
عايز قلبك يفضل جاحد
إضغط واحد
عايز تلبس بدلة خاين
باع العشرة بقلبه الجاحد
إضغط أكتر ع اللي يصونك
و إفتح قلبك للي يخونك
و إخرس كل آهات الناس
و إملا بغل فراغ الكأس
و إفتح عينك علي خاينين
تلقي خيانتك مالية الكون
ألف برافو عرفت تخون
عايز أكتر دوس إتنين
****************
إفتح قايمة غدرك وإبعت أي رسالة
توصل فورا للي إدولك وصف الحالة
اللي قالولك إن خيانتك طبع الدنيا
و اللي جابولك وصف ملامحك ثانية ب ثانية
و إنت ب تخدع ناس آمنوك
علي إحساسهم حتي أخوك
بعته برخص تراب الأرض
ح تشوف نفسك حاجة عظيمة
وإنت بجد عديم القيمة
خسة طبعك فايقة الحد
*********************
عايز أكتر إضغط تالت زر معايا
و إبعت كاميرا لأخر قلبك تلقي خبايا
و ألقط صورة لقلبك لما يخون الناس
و إعرف نفسك لو إحساسك فيه إحساس
و إشحن قلبك شحنة كبيرة
تملا حياتك غل وغيرة
و إضغط رابع زر كمان
و إحذف كل معاني الخير
و إنهب كل حقوق الغير
و إحلف إنك مش إنسان
********************
عايز أكتر حط إيديك ع الزر الخامس
بس إتمهل و إنت بتكدب أو تتخابث
أصل الدنيا لئيمة و أخبث منها مفيش
و إنت بتضغط إظهر نفسك ماتخبيش
قول للدنيا مساء الطين
علي أحوال البني أدمين
اللي حياتهم نار و عذاب
و أنا جايلهم أخد منهم
اللي معاهم و اللي باقيلهم
ليل و نهار ح يسفوا تراب
*********************
عايز أكتر خوش بنفسك علي رناتك
و إعمل رنة لخسة طبعك تحلا حياتك
و إمسح أخر دمعة ف عينك لو بتحس
حتي ضميرك لو مش عايزه دوس ف النص
و إعمل بصمة شر لنفسك
حالا يرحل منك نحسك
و التعريفة تكون مليون
بس أمانة تقوللي سعادتك
إيه إحساسك لما براءتك
تفضل تايهة ف وسع الكون
أشعار : بسام أبو مصطفي
ليست هناك تعليقات:
إرسال تعليق