................
: بسام أبو مصطفي
.............
💭أنا أسف💭
***********
يا صحبة عمر تعباني 💦 و بايعاني سنين وسنين
أنا أسف
ح أعيش واحد ماليش تاني 💦 و ح أستني ليوم الدين
ومش أسف
مفيش حاجة إسمها صاحب 💦 ولا حاجة إسمها أخين
كفانا جنون
سنين عدت بصوت صاخب 💦 و لون إسود بيعمي العين
زمان ملعون
ب لون الطين أسامي الناس 💦 و أنا بينهم فقدت الشوف
وأقول شايف
قلوب سودة ما ليها أساس 💦 ملت عمري بمعني الخوف
و أنا واقف
أبص يمين على الصادقين 💦 أشوف فيهم زمان يوسف
زمان يعقوب
وأمَلِّي عيوني م الصابرين 💦 و أشوف فيهم زمان نعسا
زمان أيوب
و أبص شمال على الجاحدين 💦 أشوف فيهم زمان الزور
وأب خسيس
وناس ظالمة وغش سنين 💦 وشوش ضلمة وكارهة النور
صحاب إبليس
و أبص لفوق لعلي أفوق 💦 وأصالح دنيتي المره
علي نفسي
لقيت الشمس وقت شروق 💦 بتتمني ولو مرة
تزيل يأسي
أنا الإنسان بني أدم 💦 أنا الدنيا بأزمانها
وكن فيكون
أنا الطوفان يا ناس ما لم 💦 تعود الناس لإيمانها
برب الكون
أنا صالح وبتصالح 💦 أنا موسي لفرعونها
أنا داوود
أنا هارون وبتسامح 💦 أنا عيسى وصلبانها
ماليها وجود
أنا أدم وإبراهيم 💦 أنا العابد لرب رحيم
أنا الإنسان
ب أموت و أحيا ف ناس تانية 💦 أخرها تفارق الدنيا
علي الحرمان
تعبت كتير من الشكوي 💦 و جوايا طريق أحزان
ماليني جروح
و مهما حاولت أكون أقوي 💦 ينسيني إن أنا إنسان
وفيا الروح
ولولا الرحمة والغفران 💦 لكنت أتمني أكون ذكري
و أبيع العمر
و لولا الخوف من الرحمن 💦 لكنت نَهِتنِي من بكرة
وشر بشر
حياة الناس بلا معنى 💦 وواخداهم علي خوانة
ورا الكواليس
تقولش صابتهم اللعنة 💦 وعاشوا بخبث جوانا
كما الأباليس
وأنا تايه ما بين الناس 💦 و ب أتمني أخلي الناس
تعود تاني
تنادي الحلم جوايا 💦 وتسمع مني شكوايا
وأموت تاني
يئست صحيح من الدنيا 💦 أنا أسف يئست بجد
ومش ندمان
ومش فاضل ولا ثانية 💦 تخليني أصاحب حد
ولو من الجان
صرخت كتير وقولت الأه 💦 ولا حد إستجاب للصوت
ف توب إنسان
أنا رافض لأي حياة 💦 أنا راحل ف حضن الموت
بلا أكفان
صلاة الموت بلا سجدة 💦 ولا ركعة عسي التواب
علينا يتوب
و أنا ف الأخرة بالسجدة 💦 ح أكون واقف على الأبواب
ما انا أيوب
صبرت كتير وطال صبري 💦 وراح عمري ف سنين باردة
برود الغاب
ووفي ربنا أجري 💦 وزاد ف الأجر ع السجدة
عطاء وهاب
جزاء الصبر من عنده 💦 لا في قبله ولا بعده
بغير حساب
وكل الكون يكون خاشع 💦 ما بين ساجد و بين راكع
لكشف حجاب
حجابه النور وهوه النور 💦 سنا نوره ف أراضينه
وسماواته
ومين ف الدنيا كان بيزور 💦 إله واحد علا دينه
ف بيوتاته
عشان يحظي بجناته 💦 وعفوه بعد غفرانه
إلي رؤياه
مُنَي عيني أشوف ذاته 💦 رضا قلبي ف رضوانه
إذا الله
ما قال يومها لعباده 💦 سلوني كيفما شئتم
وسوف أزيد
سلوني حتي تزدادوا 💦 فجناتي لكم أنتم
وعندي مزيد
🗯️ أشعار : بسام أبو مصطفي
ليست هناك تعليقات:
إرسال تعليق