............
رمضان بقشيش
...........
العِمَّة غالية
ليه تبيع كده بالرِّخيص ؟ وتبقى قُرطاس ضمن شِلِّة القراطيس !
لو على نفسك مش مهم
ان شالَّله حتى تروح فطيس
ده انت بتضلِّل أُمَم
وانت رمز لِهدايتها
ولاَّ نور بدِّد ظلام
ولَّا كِلمة حَقّ قولها
يالّلي ضيَّعت الطريق
مِن هُداها وهديتها
د انت بِعْتُه بالرّخيص
إيه اللّي فاضُل لِنهايتها
شمسها الغاربه بتِشكي
حرقِه الآه والجِراح
والسَّما شاهْدَه بِتِبكي
بَسّ بِتسجِّل عليكم
كَم نهار عدَّىٰ وراح؟
كَم ألم عَصَر القلوب؟
مين ظلَم مَّا رْضاش يتوب؟
مين صبَر عَ المُرّ لَمَّا
الصَّبْر نفْسُه مِن مرارْته وقَسْوِته بقىٰ مِ الذَّنوب؟
ما فْضِلش في الشَّجَر
حتَّىٰ العيدان طيَّرِتها الرّيح.. هجَّرِت كُلّ الطيور
ما بقاش يحوم يَمّ الشَّجَر الَّا الغُراب!
يااااه عَ الخراب !!!
إِحْنا ضِعْنا بمزاجنا ولَّا غَصْب عنِّنا؟!
ضِحِكْنا إحنا عليهم
ولَّا ضِحكواْ عَلينا إِحنا كُلِّنا؟!
ما بقَتْش فارقه
هيَّ غارقه في المُحيط من كاااام سَنَة!
وِاحنا هِنا لِسَّه بِنطبِّل ونُرقُص
كُلّ الأغاني اتبرَّأت مِن أغانينا
يِبْكي الكَمان عَ الأَمان، وِالقانون وِالعود
ولا يوم هَيرّجَع مِن شَبابَك وَلا حتَّىٰ فَرْحُه يعُود
كُلّ الأماني بَقَت بُكا
وِعَويل بِطَعْمِ الْموت..
ما فَاضِلْش غيرُه
زَيّ قَطْر سَريع عَلينا يفوت
كُلّ الأَماني اتبَعْتَرِت قُدَّام عِينينا
وِاحْنا مِش شَّايفين،
مِشْ عارْفين،
مِشْ فاهمين..
مين حَرَقْ قّلوبنا وْمين قَلّبُه عَلينا؟!
شعر / رمضان بقشيش
ليست هناك تعليقات:
إرسال تعليق