ديوان أكاليل الإلكتروني لسفراء القلم

...............

....خير زمان...للشاعر رمضان البربري 

....................

جربت مرة تمشي فيها
طب فاكرها وفاكر حواريها
كل باب بيت مفتوح فيها
إتفضل تعالي خش عندنا
نغديك وتشرب شايك هنا
مافيش في الكرم حد زينا
والضيف بنكرمة ويكون مننا
وبصلة المحب خروف
والحنية بتزيل الخوف
ولو جيت ومعاك ألوف
الشهامة والكرم في طبعنا
طب فاكر قاعدة المصطبة
وقاعدة جدي وجدك والمكتبة
وقلة المية وبراد الشاي
وكلنا ساندين علي المرتبة
بنسمع الحواديت والحكاوي
وحواديت جدي وجدك المرتبة
طب لسة فاكر ياقوت المخللاتي
والمدشة وعمك طة الجزماتي
والقادوس وحسن المغنواتي
والصييت وحولية السميعة ليلاتي
والعيش السخن والسمن البلدي
وحتة جبنة قديمة وبصلة
وعود سريس ولا أجدعها حاتي
وشط الترعة وشجرة الصفصاف
والوز والبط بيعوم مايخاف
ومحمد وعب عاطي سارحين
من الفجرية ع الغيط طالعين
والتوتة والجميزة والهوى الهفهاف
وتهل العصاري بهواها الشفاف
تشم ريحة الغيطان بحلاوتها
وكل شيء في بلدنا يا عظمتها
وانت بتستمتع بصوت السواقي
والقعدة تحت الشجر يا طعامتها
ويهل العيد ببجامتي الكستور
والنايلون والدبلان والنمور
صناعة محلية بأيادي مصرية
وزمان بخيرة والأيد عافية
وتنزل في إيد أبوك البندر
تلاقي السواري والترماي تتغندر
والعربيات نصر صناعة محلية
وريحة الطعمية في المطاعم تزغور
والعيش الفينو والبلدي الأبيض المدور
وتمد إيديك علي الحيطة تنور
مبهور بالنضافة إللي عايزة تتصور
كل شيء جميل زمان النهاردة إتغير
يارب أيامك كلها دول وبتتغير
رجعنا لخير زمان وكفاية علينا نتنور