ديوان أكاليل الإلكتروني لسفراء القلم

.......

ميتبلش فى بؤقك فولة
*****************
كلمات/علاء أحمد عبدالنبي
*******************

أعمل إية أنا وياك قولي
وإنت حرجني كسفني تملي
خليت كل الناس بتقول
حب دة ولا بتتسلي

دا إنت حالتك مش معقولة
ميتبلش فى بؤقك فولة
أي حاجة مابيني وبينك
تجري تقولها كدة بسهولة

دا إحنا كبار مش عيال
مش أي حاجة كدة تتقال
حبك ولا حب الأطفال
رجعتنا تاني للطفولة
دا إنت حالتك مش معقولة
ميتبلش فى بؤقك فولة

من صغرنا بنحب ونحلم
إننا على طول لبعض
لكن أنت والله أعلم
مش واخدها حبيبي بجد
طبعك هو مبتغيرش
الحب عندك إية متعرفش
لما إنت ع الحب متقدرش
طاير لية بين السما والأرض
دا إنت حالتك مش معقولة
ميتبلش فى بؤقك فولة
أي حاجة مابيني وبينك
تجري تقولها كدة بسهولة

كل كلامك كدا ألاقيه
من غير معنى ولا إحساس
والسر إللى نقول عليه
يبقى لبانة في بوء الناس
طب أخصمك أنا ولا أصلحك
أنا محتارة أبكي ولا أضحك
على طول كدة لسانك فاضحك
بتقول أي كلام وخلاص
دا إنت حالتك مش معقولة
ميتبلش فى بؤقك فولة
أي حاجة مابيني وبينك
تجري تقولها كدة بسهولة