......................
نجات بوريشة
.................
خليهم غالطين
خليهم يحسبوك ك بغاو
جردة ولا صحرا قاحلة
بنادم كثرت فيه الحضية
انت تمشطو حرير وهو يطلع دروج
انت ترطب معاه وهو يخرج عينيه بجوج
دردب قبل يطيح الظلام في العشية
الي كنت ليهم جنان وفيه الغلة
كل واحد ينتف باش يعمر السلة
ويبطر بيك في السروية
تكون ليهم بير عذب وحلو
كل واحد يدلي دلوو
وليد من الفوگانية
تكون ليهم طير حر
ينتفو ريشك وشعلو تحتك الجمر
واتافقوا على القسمية
تكون لجراحهم طبيب
الخير فيهم ما تصيب
وتكمل معاهم بالخطية
تكون ليهم رمى
والتبوريدة والسلاح تمة
تزغريتهم عسرية
كون انت لا ك بغاو
بكلامهم ما يتقاضاوا
ما تفهم ليهم قضية
كووون سبع
وخرج عينيك وفيهم طلع
عاد تهنى شوية
كوون قوي كوون نسر
وشد تقارك مع البشر
الى لقيتي معاهم السلامية
ك ما درتي معاهم تحير
كوون انت في الاول واااخير
راهم غير الشلاهبية
نجات بوريشة
ليست هناك تعليقات:
إرسال تعليق