................
عبد الفتاح عبد الرحمن والي
..................
فين الحق
الحق قال للباطل
ليه إنت إللي ماشي
ضحك بالصفار وقاله
يعني عمرك شوفت
فقير نام ولا إتعشاشي
ولا بعت ضحكه
لحد راح ولا جاشي
وقلب راح لصاحبه
فاضي من غير لازمه وحواشي
ما قلوب البشر إتغيرت
وصنوف الكلام إتلونت
والافعال اتزينت
اللي يقولك حلال
واللي يقولك ينفع مش حرام ماشي
أللي تصونه يخونك
واللي تعزه يهينك
واللي تضمنه يدينك
والآخر يقولك دنيا ما تسواشي
وان عملك جميل
طبعا ما أنت فاكره أصيل
يقابلك من الفجريه
يقولك أخبار الجلابيه
حافظ عليها علشان تعيش
معاك وعليها ما تاساشي
أصلها ماركه وادتهاللك
علشان إنت حبيبي
هه خليك فاكر ما تنساشي
والي قبل ما تخلص الخدمه
يقولك الشاي أصل السكر غالي
وال١٠٠ ما بقاش ليها لازمه ما جايباشي
وصرفت فلوسك وبقيت عالحديده
وأم العيال طهقت ما عيناشي
النفوس بقت فلوس
وعلشانها ناس علي ناس بتدوس
والنوايا اتأندلت والضمير
سافر بعيد ولا جاشي
عرفت ليه يا سيدي
إنت الحق أحق
وانا الباطل إللي مالوش حق
بس إركب إنت
وأنا إللي ماشي
عبد الفتاح عبد الرحمن والي
ليست هناك تعليقات:
إرسال تعليق