...................
شيرين حسين
...............
قعدة نسوان
أم سحلول و أم قويق قعدوا
ينموا وتالتتهم قطيعة
يتسلوا في سيرة الناس لت
وعجن بحكاوى فظيعة
حكوا وتسامروا فى سيرة كل
الخلق بطريقة مريعة
لت وعجن خبص ورط ماسابوا
حد بطريقة وضيعة
بداوا بالبت صفاء اللى هربت
ويا حبيبها بنت بديعة
ناس قالوا هربوا وناس قالوا
خطفها وبقت جرسة شنيعة
امها عملت محضر فى القسم
وكانت جرسة وفضيحة
أم قويق قالت تستاهل أصل
أنا واضحة وصريحة
وقطيعة قالت بنت سهنة بجحة
وامها ست خسيسة
ختمتها ام سحلول قالت بنت
ملهاش كاسر وقبيحة
سابوا صفاء فورا دخلوا في
على جوز الست سميحة
سابها واتجوز سومة العرجة
وجاب لها شقة جديدة
وجاب عفش ودفع مهر وشورها
واشترى لها الصيغة
ناس ليها حظ وناس ليها ترتر
حاجة غريبة و عجيبة
قالت ام قويق سيبوا سميحة
ايه أخبار البت مديحة
قالوا شغالة رقاصة ومسكوها
بقت جرسة و فضيحة
وجوزها المتنيل عارف الدون
دلدول راجل تلقيحة
قاعد واكل شارب ديوس لاهمه
جرسة ولا فضيحة
وسعاد قاعدة تقول حرام سيرة
الناس غيبة ونميمة
قال يعنى شيخة مصلية م ابوها
كان فلاتى بلا نيلة
فى الاخر قالت أم سحلول خلينا
فى حالنا يا قطيعة
وام قويق قالت ملناش دعوة
ليقولوا غيبة ونميمة
عندنا ولايه ربنا يسترها علي
ولادنا من كل نصيبة
يعنى الستات دول
كانوا قاعدين فى جلسة ذكر
وتعبد ولا غيبة ونميمة
كل اللى أتقال متسجل وفى
الدين معصية وخطيئة
الشاعر/ عبد المنعم حمدى رضوان
اللوحة للفنانة المصرية الرائعة/ شيرين حسين خالص الشكر والتقدير والامتنان لها
ليست هناك تعليقات:
إرسال تعليق