..................
رضاعبدالحميد
.....................
بدلت حبي قصيدة بالعامية
بدلت حبي
سيبو قلبي في حالــه بقى كفايــــه
داقلبي من الغـرام كان بالــــه رايق
ولا انذليت في يـــــوم علشــان دوايا
فـي حبــــكم انـــــا صنـــت الموده
وسقتكو مــن عشقــــي ومن هـوايـــا
من غدركو انا تاه قلبــــي منــــــي
معايا ساعـات وساعات ماهوش معايا
معاكو في الهوى كان قلبي مخلص
وربنـــــــا يعلــــم صــــدق النوايـــــــا
وكنتو عندي اغلى شيء في عمري
جعلتكم شمسـي وارضـــي وسمايـــــا
قطعتو في الوصـــال حبل اتصـالي
وياما كنتـــــــو بتتمنــــو لقايـــــــــــــا
دا لسه في الهوى بدري عليكــــــــو
ومستواكـــــو مــش من مستوايـــــــا
دا في الغرام ياما كتيــر بيآســــــي
وكل واحد في الهوى جرحه حكايــــه
ياريت ماشفتكو في الدنيا خــالص
ولا كــــان بيننــا حب مـــن البدايـــــه
انا كرهـت المحبـه مــــن اساكـــــو
وبــادعـــــــــي ربنــــا يتمم شفايـــــــا
زمـــان الناس قالـولي الحب غــادر
وبحــــــره غويط ومليــان بالرزايــــــا
ماسمعتش الكـلام وقلــت اجــرب
ومشـــــــيت في سكته بكل منايـــــــا
اتاري كلامهم كان كله حقيقــــــــي
وغرقت فيه وانا على عمايــــــــــــــــا
يارب يارحيم ياللي خالقنـــــــــــي
وعالــــــم باللي بيـــا في الخفايــــــــا
مافيش غيـرك يقدر يداوي جرحـي
لحكمتك انا باعلـــــــــن رضايــــــــــــا
دا حبك فـي العيون اصبـح أمـامي
وكل حب الناس اصبــــــح ورايــــــــا
بذكـــرك ياكــــريم رح اهني قلبــي
واصلي الخمسـه في نهاري ومسايــــا
واصلي على النبي طه شفيعـــــــي
حبيبــــك يــــــارب وخيــــر البرايـــــا
طريق الجنه في قربك ياربـــــــــي
وقرب المصطفي فيه العطايــــــــــــــا
تركت حب الناس مــن اجـل حبـك
دا حــــب غيـــــرك منبـــع الخطايــــا
في جوف الليل انا هاصحى اناديك
برحمتك اقبل تـــــوبتي ودعــــايــــــا
انتـا علـى العــدا عونــي ونصيــري
ومين يكسـرني وانا ف ايديك حمـايا
بقـــــــرب الله تنفـــــك الكـــــروب
وينصرني على نفسي وعدايـــــــــــــا
دانـــــورك ياكـــريم نـٓور حيـــاتي
ونـــــورك هــوه ده نــــور الهدايــــــه
بحبك ياعليـــــــــــــــم بدلت حبي
فثبـت ع الطريــــق روحــي وخـُـطايا
شعر
شاعر الإحساس
رضاعبدالحميد
ليست هناك تعليقات:
إرسال تعليق