....................
.................
سيم مابينى وبينك ماتكشفوش
نقول كلامنا وغيرنا ما يفهموش
الحياه عايزه اللزازه والفرفشه
أما النكد والهم لا لا مايلزموش
حلقت بالموس افكارى العميقه
وفوق راسى لبست أنا طربوش
صبّ متزركش بألوان فرايحى
غالب عليها الاحمر المنقوش
غِرقت وحدى فى بحر الفلسفه
وكلام مِمشش ناسنا ماتفهموش
ماتعملش واعظ فى مدينه خرسا
مُغيبه و أخلاقها راحت فشوش
حَرقت غيطان العلم فوق ارضها
ومالت لدرويش اهبل ومرووش
فيها ناس عاشقه الجهل والتنبله
وعاشق الجهل منه يارب حوش
اللى متكفن بجهله وهو لسه حى
وهمه بس فى التبن زى الجحوش
سيبنى وسيبك من الشعر والشعرا
اللى كلامهم يخلى الوجيعه تبوش
دول كلامهم فى البورصه بلا قيمه
أسهم عديمة الفايده ما يكسبوش
وف ميزان القوه برضه خسرانين
لا شدّو سلاح نارى ولا خرطوش
كل اللى حيلتهم قلم عاشق للوطن
بيرسمله مستقبل ويزينه برتوش
سكنهم الفقر لما سابو جمع الدهب
وراحو يجمعو الحكمه وماجوش
لكن مش فقير اللى راس ماله قلم
دا ياما اقلام هدمت وبنت عروش
ما تسيبنى وسيبك من هموم العرب
بقو زى الارانب فى انياب الوحوش
وإنك تحارب طواحين الهوا وتفوز
أسهل من جمع العرب قاده وجيوش
دَعكت مصباح الجن قولت يجمعهم
قال الجن حلم جمع العرب فنكوش
ياعم سيبنى وسيبك من هموم امه
كل تفكيرهم فى حريمهم و الكروش
فوق خيام العلم قامت قصور الجهل
والصقور غِفلت عن حماية العشوش
ودمرو عقول البنات والشباب بالقصد
بالموضه الخليعه والشعر منكوش
وضربو كل عالم بفيروس زهايمر
وكل شاعر لبس غصب عنه طربوش
طربوش يرهبنا ويجوعنا ويخوفنا
ويمنع التفكير ، ملعون ابو الطربوش
بقلم #شحاته_على_ابودرب
ليست هناك تعليقات:
إرسال تعليق