ديوان أكاليل الإلكتروني لسفراء القلم

 .....................

Kamel Bshtawi

.................................

طلبت مني الحلوة شال

اعطيتا قلبي وعيوني

يا ربي شايف هالحال

وهاي البنت المجنوني

مابترضى بوسي وسلسال

بدها لا بتوب وجوال

وشجرة لوز وليموني

وبدها فستان مقصب

وكل من شافو يتعجب

بدها ياني كون زجال

واقطع بوادي وجبال

وبدها خاتم وخلخال

وسيارة ليمو زيني

ياربي شايف حالي

خسرت البيت وجوالي

وكيف بدي إجمع المال

تا ارضي ها لمزيوني

البنت بقلبي شعلة نار

وقلبي بالحلوة محتار

يا ربي وانت الجبار

تحسن حالي وأحوالي

قال بدها نهر الدانوب

وكم أسوارة مع دبدوب

وانا في حبا عم دوب

وعم لحن لها غنية

غنية وفيها مكتوب

قصر ونهر وعلية

حتى ترضى فيها ذوب

وما تقطع عني المية

.............

شفت الحلوة على العاصي

عم تناغي هل العصفور

فستانا لونو رصاصي

والريحة فل ومنتور

طلبت تشرب من كاسي

وكاسي معبى من الخابور

معبى أشكال وألوان

شي ماورد وشي ريحان

وشوية حب وبخور

سألتا ها لحلوة من وين

حتي اكتب ها السطرين

قالت لي من راس العين

وقلبي من الغربة مقهور

ها لحلوة فتلت راسي

وسلبت قلبي وإحساسي

وقلت لها مني ناسي

القدس ورام الله والغور

قالت لي طول بالك

الأقصى منو لحالك

الأقصى كعبة كل الناس

الاقصي محراب وقداس

الأقصى بعون الله منصور

منصور بهمة لرجال

بهمة تتحدى الزلزال

ومهما ليل الغربة طال

راح ندحر جيش الدجال

ونبني الدولة القوية

بهمة وصبر وطولة بال

كامل 24/5/2022