....................
جمال حلمي ابراهيم عامر
................
حتى البامية
بقلمي / جمال حلمي ابراهيم عامر
...............................................................................
حتى البامية ماشيكه ف سكه
كلها لف كده وأدوار
يوم تمشيلي ف سكه طويله
ويوم ترجعلي زي الشطار
كنت زمان بزرعها ف أرضي
لكسب حسنه تقصر مشوار
أم محمد وام شنوده كانوا
جيران الحارة والدار
يشوفوا أمي ولا أبويه
يقولوا البيت ف حاجة لخضار
أمي تقولي أخس عليك
فين يابني حق الجار
اجري بسرعة بشحمي ولحمي
وارمي كتابي بلاها أفكار
حق الجيرة مكتوب ف كتابي
ولازم الحق يطلع له نهار
جالي اليوم ال اشوف جاري
بيبكي بحرقة من الأسعار
وأشوف الدمعة لامعه ف عينه
بس زي المسمار ف جدار
اخده ف حضني لأخفف
عنه لعب الدنيا والتجار
واقول لزمني شوفت يازمني
لعب الدنيا بقا شُغل صغار
خله حياتنا كدبه كبيرة
والصدق فيها بقا وصمه عار
حياتنا يازمني أفلام مش سيما
أفلام كارتون ضحك وهزار
مؤلف بارع ومخرج رائع
خدونا ف سكة خراب لاعمار
كيلو البامية بتاع الفقرا
بيقولوا عنه بعشرة دولار
بقت الحسبة دولار امريكي
شوفت يازمني جشع التجار
فين الرحمة لأوصل ليها
حتى لو ضاع العمر وغار
عايز اطبطب ع المسكين
عايز أخلي حياته نهار
ليه يازمني نشفت الريق
وخليت الجوع طريق ومسار
ليست هناك تعليقات:
إرسال تعليق