...................
سلوى زافون
.................
رسالة يتيم
بقلمي / سلوى زافون
أول جمعة من إبريل
زي العادة جمعة يتيمة
رسمت دمعة من
جوا عيوني حزينة
طير مشطور بجناح مكسور
وآلامه دفينة
قتلوا طموحي دبحوا جروحي
مراكبي سجينة
نِسوا أحلامي في ليل أوهامي
سرقوا الطيبة
وسط الزحمة دفنوا الرحمة
في ارض غريبة
نبتت بسمة ردوا بقسوة
مالناش في الزينة
ولسان حالهم يضرب يلسع
يقهر يوجع فينا
وبيسألنا عن أسامينا
اسمي يتيم وصفي يتيم
وإن كتبوني ف ألف شهادة
دمعي زيادة وجعي عبادة
وشرف ليَّ عظيم
زي رسولي يتيم
وإلهي فوق الكون علاه
وف قرءانه وصاه
عن قهري نهاه
واتمنى أكون في الجنة معاه
أحكي ويسمع
والبسمة لقلبي دواه
ويعوضني سنين
فيها الدمع اتبخر
من جمر كواه
وسحابه تمطر يوم في سماه
عندي بإسمي عيد بحياه
وصديق بيزورني
ويا الفجر اتهيأ للقاه
واحضن شوقه ويضمني بحياه
مش محتاج مال ولا جاه
محتاج ضمة حب
كلمة تشفي الآه
خليك فاكر إن زيارتك
بتهون على عمري شقاه
عنواني بلاش تنساه
حروفي أليمة نفسي عزيزة
أدعي إلهي حقق حلمي
أمن بوطني أعيش في حماه
ليست هناك تعليقات:
إرسال تعليق