................
...............
...ماما ...
بصغري كنت أستغرب من أمي رحمها الله تعالى لما تصرخلي ماما وتسبق أي دعوة وأي طلب بقولها #ماما ...مثلاً : ماما برضاي عليكِ البسي برد الدنيا
دفي حالك البرد سبب كل علة
...ماما جيبيلي كاسة مي
...ماما خدي مني هالصندويشة تحبي الله كلي غصيتلك بهالأكلة
..ماما آيوشة الله يحن عليكِ مسديلي ظهري ورجليي ..شبك ماما موجوعة تعي أقرالك يس والمعوذات ويروح كل الوجع
وكتير تتكرر ماما بنصايحها ياماما اصبري ..ياماما اقوي ..ياماما لاتنسونا غده من الدعوات والصدقات ..وحتى بعد ماصار عندي أطفال تقلي ياماما جيبي جوزك وولادك وتعي لعندي ..(رحمها الله تعالى وجزاها عنا خير الجزاء )
وأنا أقول لحالي غريبة ليه بتقلي أنا بنتها ماما ؟!!!!
كبرت وصرت أم وبعدت عن أمي وصرت لاقي حالي بقلن لأولادي نفس الكلمة وبنفس الطرق حتى هنن بستغربوا وحتى ابني الصغير نبهني لهالشي وقت استنكر وأنا بقله لازم نحفظ القرآن يا مامي قلي بنبرة صوت عالية ووجه مستغرب : أنااااا مامي
وضحكناااا
وقلت ياسبحان الله وكأنه الحياة شريط فلم وكأنه بنعاد علي صغرتي مع صغرة ولادي وتنيناتنا منتذكر بكل حاجة أول شغلة منصرخ ماماااا ..
ماماااا بضل الواحد بذكرها من عمر الأشهر
لأنها بنظرنا الحل السحري لكل مشاكلنا بالحياة منفتكرها بكل شي وبطلع بإيدها كل شي وبتغنينا عن كل شي وبلاها منحس حالنا ولاشي ومنضل نقولها ماما ومنضيع بلاها ومنعاملها كأنها بنتنا وبتشوفنا كأننا أمها بصغرنا نحن بحاجتها وتقلنا عالكبرة بترجع للصغرة وترجع الأم بحاجة ولادها بس بعدين منكتشف انها حتى ونحن منتطلع عليها كانت هي اللي عم تتطلع علينا والله وتحيطنا بكلامها الحلو ودعواتها وحبها وحنانها لآخر نفس وبعد ماماتت رحمها الله عرفنا شو يعني اليتم الحقيقي وشو يعني ماما تطلع من قلب محب موجوع
ماصفيله بلسم لآلامه غير كلمة ماما منحن لنقول ماما ونتذكرها بأحلى ذكريات وأحلى دعوات ومابنشبع من ماماااااا ..
أتاري لهالكلمة سحر وجمال وبركة وخير ورضى وسكينة لمجرد نطق حروفا ماما ..
قد ماكبرنا وتزوجنا وصرنا أمهات بضل فينا طفلة صغيرة بتشتاق لحضن وحنان الأم وبالبعد عنها بنستعين بأحرف كلمة ماما لتطبطب عقلبنا لتاخدنا بحضنها لتمسك بأيدينا وتساعدنا وتسعدنا لو بحروف ..
الميم بتضم شفايفنا لبعض وكأنن بعانقوا الأم وببوسوا ايديها وراسها وخدودها وياليت لو طالوا رجليها ..الألف آاااه بتطلع من القلب بتنفس عن نار الحنين والحب جواته وبترجع تجي الميم التانية بتحاكي رضاعة الطفل من ثدي أمه وبتقله يا ماما جوعان ما إلك إلا (مم) تاكلها من ماما بتكرار الميم بهدى الطفل وبنام شبعان حنان وحب من حليب ماما واهتمامها وبس يكبر بتكبر الأحرف بفترق عن أمه بألف أولى وتانية بتمثل حياته الأولى والتانية بس بضل ملزوق بالميم اللي هي الأم والحياة وبصل للنهايات بافتراق ماما عن بعضها وساعتها بضيفوا ت لل ما ...وبقولوا فلان #مات ...وبرجع بنعاد شريط العمر كفلم بتبادل الأبطال فيه الأدوار فأحسنوا انتقاء الأبطال وتأليفه وإخراجه لأنه اللي خلّف ما مات ..
ليست هناك تعليقات:
إرسال تعليق