...........
على السيد محمد حزين ــ طهطا ــ سوهاج ــ مصر
.....................
قصيدة ..
طبَّال
بقلم / على حزين
طبَّال ومطبلاتي
وبدق علي الطبلة
وفي النفاق أنا أستاذ
ومعلم , ومحاضر , وأُسطة
لا حد قبلي ولا حد بعدي
أصلي النفاق عندي غية
ووراثه أباً عن جداً
وحرفة , وصنعة
******
الكلام المزوق عندي
والضحكة والبسمة
بس قول أنت عاوز ايه
أؤمر يا بيه
كل الوجوه عندي
البسها لك في ثانية يا بيه
والألقاب والنياشين
والكلام الجميل بالكوم
اصلى النفاق يا اسطة
حرفة , وصنعة
*******
أؤمر , أطلب ,
أو من غير ما تطلب
من غير ما تأمر
يكفينا نظرة من عينيك
اشارة واحده من ايديك
بص بس لي بالعين
وشاور وهـ تشوف
وأنا رهن الاشارة
والتوجيه
******
عبدك المطيع يا سيدي
خدي مداس ,
وما يهمنيـ ش الناس
وجلدي أهو سميك
سجادة مفروشة بالورد
تحت رجليك .. رجلين معاليك
أنا لحم كتافي من خيرك
وروحي فدى معاليك
وأنا كلي ملكك , وملك ايديك
يا سيد الناس
******
كل الناس بـ يحبوك
وبــ يدعو لك بطولة العمر
ويبوسوا ايديك ورجليك
ويتمنوا لك الرضى ترضى
جنابك , سعادتك , معاليك
عظمتك, جلالتك, فخامتك
حبيب الكل ربنا يخليك
يا منور طريقنا , يا حبيبنا
يا رافع راسنا وحارسنا
ربنا يحرسك من العين ويحميك
وينصرك على مين يقدر يعاديك
*********************
تمت مساء الخميس 3 / 2/ 2022
على السيد محمد حزين ــ طهطا ــ سوهاج ــ مصر
ليست هناك تعليقات:
إرسال تعليق