................
مصطفى عماري.
..............
يمر اليوم عام على رحيل أمي
8 فيفري 2021
8 فيفري 2022
قصيدة باللهجة التونسية
لروحك الطاهرة يا روح الروح
***لميمة
يا لميمة مشيتي وخلتيني
الدموع ما كفت في عيني
قلبي مجروح والروح يامة
عليك تغرد وتنوح
يا ريتك اديتيني معاك
واديتي عمري المذبوح
عمر ما فيه من بعدك روح
والروح للروح اليوم تبوح
من نهار اللي رحلتي وفي
الجنة حطيتي رحالك
عمري يا عمري راح
طير ما بقالو جناح
نبكي ونزيد والنوم
ما يبغي جفني ولا يريد
الليل طويل أسود كحيل
عقلي فيه كل ليلة يطير
ما شفت يوم صباح
كالليل كالصباح
بدني تهد وبالي ما بقى مرتاح
يا عيني أبكي وزيدي
غير رديلي لحبيبة
لميمة راحت بعيد
ما بقالي غير البكاء والتنهيد
ما عد يرجعلي عيد
ولا عاد العيد بفراقك سعيد
يامة يا روح الروح
ياللي قلبي عليك مجروح
القلب دم ينزف نزوف
والعقل طار قوليلي
يامة وين نروح
نصبر في روحي ع الروح
و الدمعة تفضحني
تنزل على خدودي
وبسر مري تبوح
آش يصبرني يا عمري
والصبر هجرني وداني
عل الموت ها الدنيا
يامة ما بقات تحلالي
خذيني معاك خذيني
مين غيرك يامة يمسحلي
دمعة عيني
نكتب والدموع عل الخد سيالة
يا ربي عجل وصل لأمي الأمانة
الروح ليها عطشانة
ما بغيت نعيش لوحدي
في دنيا فانية وخوانة
وديني لروح الروح
ما بغيتها تبقى
وحدانية
زعلانة
أنا أمانة فرحتها
وصل يا ربي الأمانة
لميمة تبقى فرحانة
وأنا قلبي يرتاح.
اليوم عام ماللي غابت
وروحي مع روحي غابت
يا ربي سهل الثنية
واديني للغالية عليَ
أمي يا ممو عينية
قلبي محروق
والروح مشوية
الروح مشوية
الروح مشوية.
إبنك الأسود
كيف ما كنتي تنادي عليَ
نامي يا اميمتي وارتاحي
نزورك قبل ما يطلع صباحي
نتمنى الموت تجيني
وما نبقى عايش في غبينة
آش من دنيا بعدك يا حنينة
وأنت غبتي على عينية
وأنت غبتي على عينية
وأنت غبتي على عينية.
إبنك مصطفى عماري.
ليست هناك تعليقات:
إرسال تعليق