................
عبد الرحمن فتحي الحناوي .
...................
بشعر العامية المصرية
( لسه فاكر ... !! )
لسه فاكر تبتدي تكتب جواب
لسه فاكر تفتكر بعد الغياب
لسه بدري عالنسيان
بدري عالحب اللي كان
شمعه قايده منوره
ورده بيضا معطره
**** **** **** ****
لسه فاكر دا انتا قاسي
كل يوم بعدك بقاسي
من غربه كانت مش عالبال
من هجر ماشي يهد جبال
**** **** **** ****
لسه فاكر تبتدي تسأل عليا
لسه فاكر لوعتي ودموع عينيا
عمري ما انسى لهفتك أبدا عليا
عمري ما أقسى لو خدوا مني عينيا
**** **** **** ****
اهجر براحتك بس خليك لسه فاكر
أيام مضت من عمري فيها قلبي شاكر
تروح بعيد تيجي من جديد خليك مذاكر
ذكريات مرت علينا قلبي ليها ما كانش ناكر
**** **** **** ****
لسه فاكر تبتدي تكتب كلام
وانا كل ليله بشوف خيالك في المنام
لسه فاكر تبتدي تكتب روايه
وانا كل يوم بحكي عليك أعظم حكايه
إنتا البطل إنتا الحبيب م البدابه للنهايه
**** **** **** ****
لسه فاكر ولا آجي أفكرك
سهرتني والدور عليا أسهرك
علمتني وانا كان زماني بعلمك
غيرتني وانا كان منايا أغيرك
**** *' *** **** ****
لسه فاكر ولا الحياه خطفت عواطفك
والغربه شغلت دنيتك كسرت بخاطرك
لسه قلبي مليان هنا وزاد في الحنان
مستنياك ترجع لنا بالسلامه والأمان
مستنياك ما نسيتش دعوه أدعيها لك مع الأذان
**** **** **** ****
لسه فاكره ضحكتك لما الصبايا ملوا المكان
لسه فاكره همستك والشوق معايا من زمان
لسه فاكره نظرتك لما اتقابلنا في الميدان
لسه فاكره خضتك لما شافوك معايا الجيران
لسه فاكره بسمتك لما رئتني ورا الصوان
لسه فاكره كل حاجه مرسومه رسم بالألوان
يا تري انتا فاكر أي حاجه ولا زارك النسبان
--------------------------------
بقلم د / عبد الرحمن فتحي الحناوي .
من مصر .
السبت ١٨ من ديسمبر ( كانون الأول ) سنة ٢٠٢١
ليست هناك تعليقات:
إرسال تعليق