..................
/ زينب سليم أحمد
....................
((( حبيبي هوائي )))
================
قلب حبيبي أصله هوائي . . .كل يومين بيحب لي واحدة
وأما اتغاظ وتضيق أخلاقي . . . يحلف أنها اخر واحدة
هما يومين ويعيد الكرة . . . . . لما بَصمْت ياناس بالعشرة
قولت كفاية وهي المرة . . . . أصل بجد شبعت مناهدة
قالي دي كلمة ازاى تقوليها . . .انا لو غيبتي هاتوه وهآسي
اخر غلطة ياريت تنسيها . . . . ولا يوم تاني مني تقاسي
وبيعملي صحيح ندمان . . . . جاي بشوق وبكل حنان
على طول قلبي يسامحه أوام . . وبكدب ظني واحساسي
فجأة بيرجع تاني ملخبط . . . . ولا يسمعني لو بناديله
دايما سارح مش متظبط . . فيه شيء شاغله وهادد حيله
أسأله مالك مش بيرد . . . . . ولا حاسس بيا ولا بحد
يومها اتأكد أنه بجد . . . . . تاني رجع يلعب لي بديله
حد يقولي اعمل فيه إيه . . . ولا قادرة اسيبه ولا اكمل
واما القاني بقسى عليه . . . . قلبي يلومني ومش بتحمل
وبقول طبع وبكرة يفوق . . ولا مرض واكيد هايروق
وارجع اعامله برقة وذوق . . . وبرضه بحبه مهما بيعمل
=============================
بقلم// زينب سليم أحمد ..
ليست هناك تعليقات:
إرسال تعليق