........
عبده محمد علي الشيمي ابن قنا
...........................
حبة ورق
مش كل اللي بيلمع دهب
وعيار وآحد وعشرين
فيه صيني بريقه غلب
وبيزغلل العين
وع الميزان الأصل فرق
وأدينا عايشين
وسالكين نفس الطرق
متكتفين بحبة ورق
الميلاد والمدارس والسفر خارج البلاد
والزواج
وكل كل المعايش
وتمن الكد والعرق
حبة ورق
حتي الخروج م الحياة
يلزمه تصريح وشهادة ورق
وبين الوصول والرحيل
شقيانين علشان نجمع
حبة ورق
بالحلال أو بالحرام
بانحراف أو إلتزام
مجاش في بالنا يوم
أننا راحلين
البيوت والفلوس والنفوذ
والطين
خلق تاني غيرنا ليهم وارثين
وأنت يا مسكين
مفضلش منك غير اسم
وصورتين ورق
والنجاة من خضم بحر الحياة والغرق
الخوف من الله
واتقاه
والحمد ليه والشكر ليه
ع اللي وهب
ومش كل إللي بيلمع
دهب
عبده محمد علي الشيمي ابن قنا
ليست هناك تعليقات:
إرسال تعليق