................
متعب النجار
.................
أمثال شعبية
========
مجموعة من الأمثال الشعبية حاولت أقدمها بشكل مختلف وذات مضمون أرجو ان تنال إعجابكم
~~~~~~~~~~~
تريد أرنب أخذ أرنب
تريد غزال أخذ أرنب
لدوخ نفسك ولتحير
الأرنب التعرفه
أحسن من غزال الماتعرفه
ولدور أبد تغيير
إرضه بقسمتك ولتتبطر
تره الما رضه بجزة
بجزة وخروف يصير
شتريد قابل مثل العالم تصير
الناس تمشي واحنه نرجع ليوره
بالظبط مثل ب..و..ل البعير
نايمين ورجلينه بالشمس صار سنين
والميناهن بخاشوكه راحن بجفجير
نمشي وره اليمشون ومنباوع بعيد
نوكع بحفرة لو نوكع ابير
مو مهم...
صرنا مثل اعمى يكود بضرير..
ياهو الاجانه وكال آنه ابو زيد
سوه الهور مرك والكصب خواشيك
بس بالحجي...
وكت الفعل..لا بالعير ولا بالنفير
حمل مايل ومينعدل..
والحظه فكر يبقه فكر..
ويعضه ال ج...ل...ب لو فوك البعير
هذا حال إللي كل خيره لغيره
حنطته تاكل شعيره
وهذا تالي المايعرف التدبير
تسكت...البيك ميخليك
تحجي..محد يسمعك
وحجايتك مثل...عطسة...بسوك الصفافير
يكولون التتواعد بي احسن من التاكله
واحنه لا أكلنه ولا متواعدين
راحت الصايه وراحت الصرمايه
وهذا الغطه وهذا البير
منين اجيب حقك وإلمن بعد تلزم
عصفور كفل زرزور
وكلمن يعرف شوكت يطير
فرهود صار وكلمن نتف نتفه
وياهو التكله... يكلك شعرة من جلد خنزير
مافاد كل إيمان
من نفس الجحر يوميه ملدوغين
مبيوكين..ونمشي وره الباكنه بليه تفكير
غركوها السفينه..كلمن يكول آني الملاح
بس شرهم عم علينه..وماشفنه منهم خير
متعب النجار / العراق ٩ تموز ٢٠٢١
ليست هناك تعليقات:
إرسال تعليق