...............
عصام حسيني السيد مدين
........................
(( رسالة مِن نملة للإنسان ))
الذي هدمَ بيوتها و قتل صغارها
بقلمي / عصام حسيني السيد مدين
...............................................
سـلام للي دايـس عـلـيـا و خطير
سـلام للي عـــامــل مِعلِـم كبير
معاك بَس نملة في حُفرة و شفير
بتصرخ لظلمك يا قـاسي و حقير
...........................................................
في جُحري الصغير يــا إنسي المِعادي
بَــنــــــادي اللــــيــــلادي
و صــوتي بيطلـع مُـشـوه ينــادي
لقلبك كفاية تدوسنا الساعة دي
و كـُـــــل الـســــاعــــات
بنادي بصراخي صراخي السُكات
بيوتنا مُباحة لـرِجـلك تِـدوس
ولادنا نفوسهُم كـوِلدك نفوس
و دنيــا الخلايق رحايا و تروس
بلاش القساوة ده رزق الخلايق
جميعهم لرازق مقسم حاجات
بتطوَل و عايش غُرورك ساعات
و فاكر بإنــك خلودك أكيد
و ناسي الــتراب و لَـحـد المـمات
بقولك يا نـاسي النهاية استفيق
طريق القساوة ده أسـوأ طـريق
و عيلتي جميعاً كنملْ في جحور
بنشقى و نتعب ما نـأذي الصديق
بنبني في بيوتنـا في حـالنا و سلام
فكِيف إنت تنسَى معاني السلام
و تهدم بيوتنــا بجـزمة و حـريق ؟
تدوس الـــولاد و تفعَـص بقسوة
و تضحك ما شايف دموعنـا بآلام
يا إنسي يا غافل شطوطك حــرام
جنوحـــك تجبُر ده غـدر اللئــام
رسالــتي الحزينة بترفـُض كِـتير
ضمير اللي ماتوا في مــوت الضمير
بَـدافِـــع و حَـقي أدافـــع و أغــير
دي عِيلتي بشوفها ضحايا لقِدامَـك
شايفنا بعيونك صِغار عَن مقامَـك
و ناسي الحقيقة ده خلـق و نظام
و كُـلٌ مُيسر لحكمـة و مَـــرام
و حظي إني جيت في دنيا الكُبار
كنملة و صَغيرة بترعَى الصِغـار
و إنـت اللي عَـاقـل و قـاري و مُثقف
تِـهَدِم بيـوتنـا ببشاعـة و تخـلُـف
ولادنـا الـعُــزاز بجــزمِـة سَعادتك
تِـمُوت الـولاد و نبـقَى فـي حصار
يا إنسي رسـالـتي بتبكي بمَــرار
تَـذكر ولادك حيـاتـك و مُـوتـك
و حَكِم ضميرك و ارفــع شِـعـار
شعار اللي يرحم ضعاف الخلايق
يا عايق و فـايــق و مـاسـك سيجار
سـلام للي يفهم مــعـــاني السلام
يا إنسي يا ظـالم بقَول في الخِـتـام
تَـذكر كـلامي و إوعــا الكلام
إمـــضــــاء
نَـمــلة مِـن الجُـحـر القِـبلي
في جنينة الحاج عبد السلام
............................................................
بقلمي / عصام حسيني السيد مدين
مصر المحروسة
(( رسالة من الإنسان ردا على النملة ))
بقلمي / عصام حسيني السيد مدين
..................................................................
يا نملة جَنينة و عايشة في جُحور
وَصلني كـلامِــك فــي ساعة فطور
فَــَ سِـيـبـت الطــعـــام
و حَـتى اللـيــلادي مــا جــاني المنام
دُموعي الحزينة بتحكِي الكلام
و قلبي عشانكُـم بيصرُخ حزين
في يوم كُنت مـاشي مِقبل لفين ؟
ما فاكر حقيقي فدوست بقدامي
بيوتكم ما شوفت اللي تحتي خانتني
خانتني العينين
قَـتـلـت بعَـمـايــا ولادكــوا الصِغار
و سيبت في قلوبكم جراحة و مَـرار
صدقيني بس مِـش قصدي اللي كان
كنت أعمى كان ضروري أخلي بالي م الجيران
كنت فاكر إن كون الله بناسه
أمـــا بــاقــي الـخـَـلــق حِـفـنـة مِــــن فـــــــيران
بس نَــدمي لــو يفيدكم كُنت عديت مِن زمـان
كُنت مَـلـيت الدنيا دَمـــع كنت سَمَعت الحيطان
صوت بُكايا ع الخطايا في حق نملة بيتها كان
تحت رجلي شيء مباح
بس أرجوكي السماح
في النهاية و في الختام
اللي يرضيكي راح يكون
إمــضــــاء
إنـســان و نــــاقــص فـي الــعَــلام
..............................................................................
بقلمي / عصام حسيني السيد مدين
مصر المحروسة
ليست هناك تعليقات:
إرسال تعليق