.................
بسام أبو مصطفي
...............
إعدام مراية
***************
صحيت م النوم و أنا شايف ف أحلامي
كابوس مزعج عن الإنسان
و كان ف نهايته إعدامي
مشيت قدامي ف مرايتي
لقيت العلة ف بدايتي
ونظرة ف عيني مكسورة
عشان تحسيني للصورة
أخد مني سنين عمري
بشوف جوايا كام إنسان
و أعودهم علي الحرمان
و أعيش مغلوب علي أمري
************************
بداية غريبة متهانة بمية بكرة
كأن مرايتي عايزاني أكون ذكري
وأنا ماشي وضهري ليها مش شايف
عشان لو ح أمشي قدامها ح أعيش واقف
وأكون أضحوكة للدنيا
وتملاني هموم تانية
معدية رقم مليون
وأبات مرسوم علي مراية
و أفقد بعدها الغاية
و أتوه مِنِّي ف وسع الكون
بداية غريبة مرفوضة تمام الرفض
د أنا إنسان وتكويني تراب م الأرض
أعيش إزاي و أنا مجهول لدي نفسي
و أكلم مين وأنا مذهول مادام نفسي
ح تفضل عايشة مسجونة
ف حضن مراية مجنونة
ومنسية كما الأموات
ومطموسة معالمها
بإيد جاحد معلمها
تشوه كافة الأوقات
********************
شاورت لنفسي ف مرايتي وكلي سرور
بقية مشواري وحكايتي ف حضن النور
أنا ماشي يا عنوان العذاب واليأس
خلاص عِرفِت خطايا النور وشفت الشمس
أنا تعبان كتير مِنِّي
يا حرماني أكلمني
وغرَّاني بزيف نورك
ح أعيد تكويني من تاني
و أدوس همي و أحزاني
و أعدي لبكرة من سورك
*******************
شروق الشمس مستني خروجي ليه
و إصرارك علي سجني خلاص إنسيه
يا أضعف شئ ف تكويني خداعك بان
وجودي معاكي لا يعني حياة إنسان
دي آخر لحظة يا مراية
قتلتي الحلم جوايا
و حرماني أعيش أيام
و لو طالبة كمان تفسير
نهاية كل زيف تكسير
وكان الحكم بالإعدام
أشعار : بسام أبو مصطفي
ليست هناك تعليقات:
إرسال تعليق