.................
نجوى رسلان
..............
(سامحنى يا ابنى ) بقلم د/ نجوى رسلان
سامحنى ياابنى على قَلبْ
حُبُه لِيكْ كبير
سامحنى يا ابنى على حلم
غرسُه كان فيك أصِيل
سامحنى يا ابنى على عُمرى
طُوله كان ليِك قَصير
سَمِّيتْ عليك
والدعوة لِيك
يارب بارك
يارب فيِك
زمان قَالوُا جَاها ولَد
ماكانتِش فارقة معايا نوع
بِنت كُنت أو ولد
شعوري ملكك كُلي طُوع
قِطعة مِنى ويوم سَنَد
جايز عيون غيرى ما سَمَّت
رقِيت عِنيك
جايز قلوب غيرى ما سِمعت
ناديت علِيك
كانت صافية فىَّ النوايا
زرعتْ فِيك كل المَزايا
بتعاتبنى وتقول عيوب!!
رسمتْ فيِك أملى ومُنايا
بتجرحنى وتقول غُيوب
وجعانِى منكْ كلمة واحدة
دواها قلبى وقال نُدوب
بكرة جَي معاه يِدوب
شروق وشمس
ولَّا جَي معاه غُروب
صراخ وهمس
سامحنى يا بنى على قلب
حبُه ليك كبير
فوق احتمالك احتماله
قُلت عِبء
قُلت ومَاله
بكره يفهم فين مكانُه
أو يِحس بقلب شاله
بين ضلوع فرْشَها كان وثيِر
بين رِبُوع ريَّها كان غدير
زادت فى يومها ريَّها
زِهق وقام يقولَها
إن الحلم أخره مِيل
إن الضي كأنه ليل
إن الرَّي فيه هزيل
سامحنى يا ابنى على حلم
فيك اتولد
شمعة ونورها كان سَند
لىَّ أكمل الطريق
صرخة وصوتها كان وعَدْ
إنى أكونلك الصديق
فاق الكلام من غفلته
سَلِّم خلاص بغلطته
فاض الحنان من جُرِّته
سَال وبدِد فرحته
أصل الجِراب
زِهق خلاص من فتلته
كُل الكلام
تاهت فيه منه النقط
جُوفه سطح مُش غَريق
صُوته نَبْح مُش رقيق
فَرَشتْ عُمرى بين إيديِك
كُنتْ سَمعَة معاكْ نِدايا
عِشقت ألمِى بين عنيك
لا مَرة فى يوم قلت أسلِّم
لازم أكمل للنهاية
لا مرة فى يوم قُلت أنَدم
لازم أوصل للبداية
معاك يا أملى فى قصة تانية
بطلها حلم حلمتُه فيك
حروفي شاهدة والأمر ليك
كل سطر فيه كلام
كل كلمة تقول وئام
وصفحة منها تُكون آلام
ضِحكتها تِعلى بنظرة ليك
حصاد و لسَّه ما جاش أوانه
لكن بعافر وأقول ومَالُو
حلمى فيها بردوا إنت
رسمتُه فيك
حلمته ليك
صِحيت فى يومى
مالقيتُه نَابِت
ولا ارتوت
حروفه فيك
كان حلم حالم
وربى عالم
قلمى رسَمُه
يوم ماشفتك
فى الدنيا جِيت
هَجَرت سطرى
كسرتْ قلمِى
وقُلت حِلمك
غريب يا أمي
غريب فى عُمرى
عمرى امتداده
فيك يا أملى
رويتُه يوم
ويوم دعيتْ
تكبر تنوَّر عيون وبيت
تِشعِر تِسَطَّر ديوان وبيت
سامحنى يا ابنى على حُب ليك
كان كبير
فاض منه حلم وحِلمُه فِيك
خاف عليك من كل همسة
أو نسمة طارئة
تجرح عنيك
رسم بريشة صُورتك معاه
ولونها زاهى بلون حَياة
رواكْ بِهمَّة معاها ضَمّة
شِرب معاها هموم كتير
لَجل عُيونك قال مِكمل
مهما كان طريقه ليل
لا عُمره مَلْ منك وكَلْ
لا عُمره قال طريق مُحال
معاك يا عمري وفيك بَضُم
كل الأمانى قَنادِيلها ليك
ولا عمره مال عن عِنيك
فى قلبى حَضنه
مهما قَسِيت
أحِنْ ليك
سامحنى يا ابنى على قلب
حُبه دَفِيتُه فِيكْ
بين الضلوع من غير رجوع
خُفت عَليِك
فَكَرتْ فيِك
ومَعاك ولِيك
حِلمت لِيك
وبيِك وفِيك
رَسمْت حِلمى كأنُه سُور
عِمدانه نور
عَشِّمتْ أملِى كأنَّه دُور
بُنيان يطُول
على السطور
يوم أحايلُه
ويوم يميل
أرجع وأعافر
وأقول مسافر
راجع أصيل
أصلى رويته بماء غَدير
كنتْ بَصَّفِى قطراته قطرة
أخاف تُرابه فى يوم ينوله
أو شوائب فى يوم تِطوله
أحمل عَنُه أى عَثْرَة
سامحنى يا بنى على قلب
حُبه لِيك كبير
قلب أُمْ عَاش يضُم
قلب أمْ يحضن يلِم
لا عُمره ضَنْ عليك بفرحة
لا عُمره طَنَّ فيك بنبحَة
أصلُه فى حُبك عاشق عليلِ
أصله فى قُربك عازف هَدِيل
سامحنِى يا ابنى على قَلب حَبَّك
حُبه كِبير
خُفتْ عليك من دنيا جارحة
صُوتى طِلع كِفياك مِقاوحة
وقفت أصُدْ
إيدى أمِدْ
إيدك تِشدْ
قلبى يوِدْ
سامحنى يا ابنى
على كل نَار أقُول شرر
على كل مُر أقول قَدر
جاوبنى ياابنى
الناس علىَّ استكثروا الحلم فيك!!
ولاَّ تُوب الحلم يا ابنى طويل عليك؟!!
إيد جُرتي فيك اتكسر
عَصَرْت حِلمى واتنشر
وأرجع أقولك
سامحني ياابني على حبي ليك
بقلمى د/نجوى رسلان 28/1/2021
ليست هناك تعليقات:
إرسال تعليق