ديوان أكاليل الإلكتروني لسفراء القلم

 ................

إدريس بندار.

.............

كَاسْ العَشْرَة(زجلية) ============

مَنٍّي يَتْهرسْ كَاسْ العَشْرَة

يْطِيرُو شْقُوفْ الْمَحَبَّة

تَخْلَى الْخِيمَة

تَرْخَاصْ الْقِيمَة

وْنْتِيهُو فْدْرُوبْ السُّؤَالْ.

وَمَنِّي يَتْسَرْسَبْ خَيْطْ الْكُبَّة

تَتْخَبَّلْ العُكْدَة

وَيْطْيحْ الْمَنْجَجْ بْلاَ سَبَّة

ونْسَوْلُو:

عْلاَشْ الْوْجَهْ فَالْمرَايَا

يَلْبَسْ قَفْطَانْ لَهْبَالْ ؟

والرَّاجَلْ مني تْدَخْلُو لَبْرُودَة

يْقَلَّبْ عْلَى غْزِيلْ لْقَرْشَالْ

تْوَلِّي سَاعَتْهَا لَمْرَا غْطَاهْ .

تْفَرَّشْلُو حُبْهَا شَلاَّلْ

حِيثْ هَاكَّا الْحَيَاةْ ...

عْطِينِي نَعْطِيكْ

وَلْفْ وَرَبْطَة وَحْبَالْ

وْرَحْمَة مَنْ عَنْدْ الله

تَسْقِى الْوَرْدْ إِلَي ذْبَالْ

و فلحظة...

يَظْلاَمْ اللِّيلْ

تَطْفَا شْمُوعْ لَمْحَبَّة

وَحَبَّة وْرَا حَبَّة

تَكْبَرْ الْقُبَّة

وَتَتْكَدَّرْ الصْفَاوَة

تَعْرَا الشَّجْرَة مَنْ جَلْفَة

وَيَتَّفْتَلْ شْرِيطْ لَعْدَاوَة

وَفِينْ الْخَاوَة

عَاوْتَانِي عْلاَشْ؟؟

يَاكْ قَالُو الجَنَّة

تَحْتْ قْدَامْهَا

وَالْمَسُّوسْ يَحْلَى فَكْلاَمْهَا

وعلاش تجرحو الوردة

بلا سلاح بلا عدة

ويبقى الدم سايح

والدموع موال ؟؟؟

هذا زمان الردة

عنف بماية نوارة

وحب بألف جذر

رد بالك

كل دمعة منها

يتهز عرش القدر

هذاك قلبك ولا حجر

"هن القوارير"

ﯖالها خير الرجال

وقولو حكمة وجمر

وأنت كن حضن دافي

لا تكن قسوة وغدر

المرا هي امي وأختي

ناري وجنتي

شجرة بظلها

وحلاوة التمر

سقيها بفيض بهاك

يبغيك كاع الشجر .

إدريس بندار.

========