ديوان أكاليل الإلكتروني لسفراء القلم

..............

......رشاد الدهشورى....

......

رسالة شهيد...
يا امى.شدى حيلك 
عارفك قاسيتى كتير
وعاوزك تكملى المشاوير
وحشانى 
بس الموت بينى وبينك
اوعى يا غالية
الدمعة تطل من عينك
انا روحى وياكى
وبدعى ربنا يعينك
انا عند ربى
بس عيونى شايفينك
يا امى اياكى الدموع
دا الدمع جوا العيون
بيزل الغلابة
والحزن لو مدفون
بيزيدك صلابه
خدى جلابيتى
واعمليها خيال متة
تخوف الغربان عن دارى
وخدى طقيتى
والبسيها ف العصارى
وزمى دموعك يا امى
واوعى تبان لجارى
لتزيدى خوفى وهمى
وتقيدى نارى
انا ما نيش جبان
بس الحقيقة
خلى بالك م البيبان
ولوحسيتى انك جعانه
النيل جعان
ولو نداكى العطش
النيل مليان
ومش هوصيكى من فلان
اتغطى ولو فى الحر
الباب المقفول يصد الشر
وما فيش ديابه بتاكل الانسان
ما تبكيش عليا يا امى ولا تباكى
واقفلى بابى وشباكى
روحى معاكى فى كل مكان
انا عايش هنا جنبك
فى طين الارض والرمان
وجوا الزرع واللبلاب
وجواكى
وف نجمه تطل ساعة الفجر
تصحى الأهل والاحباب
وفى طلعة القمر على سطح دارى
ونزول الندى والضباب
وف طلع النخل والأعشاب
وفى طلعة الشمس فى نهارى
افتكرينى بالخير يا وش الخير
ودارى واتدارى
ماتبكيش على يا امى
انا ف عرضك
ماتضيعيش الزمن
وازرعى ارضك
حطينى بزرة قمح فى القراريط
حطينى لقمة عيش فى بق يتيم
واقرى على الفاتحة والترانيم
تطرح غيطانك كلها زغاريط
.....................