........
مغاوري كروش
........
(حدوته ملتوته)
الشاعر مغاوري كروش
بالعاميه المصريه
------------------
دايما باحلم
لما بنام واتغطي
واكون دفيان
باحلم بامي وابويا
وجارنا عم زيدان
كان يقابلني وهو بيضحك
واما ينهنه
كان بينهنه فيه أنسان
واما بنام مكشوف
عريان
عيني تشوف الحلم كابوس
رجله تدوس علي كل الروس
رجله تدوس
علي كل الخلق
وزي البرق
يتوه العقل
مابين الغرب وبين الشرق
ويخليني أطير ع الصين
وبلاد الهند
ويرجعني ف لحظه
بلاد المستر بوند
واما أحاول مره أعانده
مابينفعش معاه العند
فاسترخيت
واستسلمت لأيده تشيلني
وتسرسبني جوه سحابه
رخت ميه
فوق راس غابه
فاترخيت
علي خيط ف الميه
واتقلبت في حضن سريري
يمكن اتوه م الحلم شويه
فلقيت نفسي ف وسط الخيه
شفت بعيني وحوش
ف الغابه
عامله عصابه
مستنيه نزولي بحرقه
البرتيته
واللقيطه
والنطيطه
وكل الفرقه
وانا قدامهم كنت فريسه
وباكل علقه
مانا في التو ونفس اللحظه
كل أرادتي اتسرقت مني
وانا في الزنقه
كل وحوش الغابه اهتموا
وصغيرهم قبل كبيرهم
جم واتلموا
وقفوا طابور واللي بييجي
عليه الدور
يسأل نفس سؤال الاول
ايه اقوالك يا مغرور
قول ماتخافشي
ولاتكدبشي
مالك واقف كده مرعوش
احنا صحيح ف الصوره
وحوش
من غير ريشه ولون منقوش
حتي الهدمه ف وقت الخدمه
الديل مذعور
ودراع مقطوش
لو حانجيب الدور م الآخر
تبقي صورتنا
عاوزه رتوش
لكن نرضي بكل العيشه
لو فروتنا تكون الخيشه
بس اللي احنا مانقبلهوش
اسال عنه مغاوري كروش
وانزقيت م الحلم بقوه
بعد مادقت الكلمه المره
قالوا ياأنسي
اطلع بره
روح لبلادك وولاد جنسك
والله مافيكم الا لسان
واوعي تنام ف سريرك
مره
كاشف نفسك
او عريان
الشاعر / مغاوري كرو ش
٢٠١٨/٨/١١
ليست هناك تعليقات:
إرسال تعليق