ديوان أكاليل الإلكتروني لسفراء القلم

بقلم
حسن محمد على
**************

مقسوم نصين
.....
نص فيا بيحبها
ونص رافض قربها
ونص رايح عندها
ونص بيبعد عنها
...
وانا مقسوم نصين
ع الحال دا بقالي سنين
مش عارف انا فرحان
ولا حزين
...
لما بشوفها
نصي بيكون مبسوط
ونصي م الغيظ بيموت
ونصي متحزم برقص
ونصي بيرقع بالصوت
...
لما بشوفها
نصي بيحضني ويجري
ونصي مهموم بيبكي
وانا ولا داري بنفسي
محتار بين قلبي وعقلي
...
لما بشوفها
نص فيا بيغني
ونص بيزعل مني
نص فرحان ومزئطط
ونص بيبعد عني
...
...
لما بتغيب عليا
نصي بيقلق عليها
ونصي ولا حاسس بيها
نص م الشوق مبينمشي
ونص رافض كل ما فيها
...
لما بتغيب عليا
نصي دموعي بتجرح خده
ونصي عايش ولا همه
نص شارد الذهن
ونص بيعمل اللي بيحبه
...
لما بتغيب عليا
نصي سماه مليانا ضباب
ونصي مزاجه في السحاب
نصي نبض قلبه هيقف
ونصي عقله فرحان بالغياب
...
لما بتغيب عليا
حزن قلبي يهد جبال
وعقلي يقولي دا لعب عيال
وانا مقسوم نصين
فين طريق راحه البال
.....
.....
#مقسوم_نصين