..................
....................
" الصياد والصنارة "
يا صياد خلي بالك من الصنارة
وإياك تبيعها بـ خسارة
وطول بزيادة بالك...
صحيح السمك فيه الزفارة
لكن ده رزق عيالك...وكارك
وكل واحد وليه كاره
وإياك يسرح خيالك
وتمشي ورا النفس الأمارة
انت في الشتا وفي الصيف
بتصيد وبتستحمل البرد و الحراره
لكن يوم الحساب شديد
ومش هتقدر تستحمل ناره
صحيح بقالك زمان بـ تصيد
ولساك مبنتش العمارة
لكن عيالك أكيد...طالعين
بعيد عن الحرام ومراره
وربك دايماً مُعين...وبيرزق
النمل في قلب الحجارة
وأكيد إنت عارف البحر وقراره
وأكيد حافظ جميع أسراره
وأدرى مني بالنيل وتياره
ومهما طال الليل هيطلع نهاره
يا صيااااد خليك شاطر
وإياك تحسبها شطارة
******************
توضيح صيادنا المذكور
******************
كل مَن هو صاحب مهنة
وكل مَن هو شاطر في كاره
سواء كان صياد
أو بنا أوصنايعي محارة
أو سباك أو حداد
أو عامل في ورشة نجارة
أو اياً كان... المهم
إنه راجل وبجدارة
وشايل مسئولية
عياله وحامي داره
والمهنة هي الصنارة
إياك تبيعها بخسارة
حافظ عليها كويس
واستخدم معاها المهارة
ومتستهونش بيها ده أجدادنا
الفراعنة عملولنا من الحجارة حضارة
وأي واحد في العالم
يتمنى يجيلها زيارة
خليك تاجر طاهر...عشان
كل تجارة تحتاج إلى شطارة
إلا التجارة مع الله
تحتاج إلى طهارة.
روعة إبداع ماشاء الله
ردحذف