....................
عاطف عبد الحميد
....................
ام سيد
......
و برغم طعم الشقا
عاوزه تاكلها حلال
و لا نصبت المشنقه
للجوع و ضيق الحال
دمع اليتامى عرق
من فوق جبينها حياه
وعلى كعوبها الطرق
سايبه الشقوق موال
.....
الضحكه فوق الوجع
بالنعمه حالفه تعيش
والدمعه ما بتتسمع
مهما بجفونها تجيش
شبعانه من غلبها
بس المرار بالجوف
مين ف الرضا قدها؟
الروح عليها شاويش
....
منسوخه بين البشر
ممسوحه م الكراريس
وخيال مابين الصور
بتعيشها ف الكواليس
مصريه زى الجمل
ف الشده ميت راجل
تغزل بخيط الأمل
م الحزن احلى عريس
....
عاطف عبد الحميد
تحياتى واحترامى لكم
ردحذف